24 صينية الجمبرى والكابوريا والسبيط مع شوربة السى فوود مع الأرز ( من طبخات المهندس فاروق عبد الحفيظ (خالي العزيز )

السلام عليكم ورحمة الله وبركاته


النهارده جايبلكم اكله من ايد احسن طباخ اكلت من ايده وهو خالي المهندس فاروق


بجد اكله رووعه واحسن حاجه فيه انه بيستخدم كل حاجه في اكلاته


يعني لو هيحشي كوسه هتلاقيه بيستخدم قلب الكوسه مش زيينا بنرميه وخلاص


بيحب كمان يعمل الاكلات الجديده اللي مش تقليديه وبيضيف عليها بهارات اشكال والوان


بصراحه اللي ياكل من ايده يرجعله تاني زي اللي بيشرب من نيل مصر بتاع زمان مش بتاع دلوقتي

هسيبكم دلوقتي مع الاكله زي ما ارسلها ليا بالظبط وبالهنا والشفا وميرسي ليك يا خالو يا حبيبي

الكميات:

1 كيلو كابوريا كبيرة ( 4 حبات)
1 كيلو سبيط متوسط الحجم( منظف أو غير منظف)

نصف كيلو جمبرى بقشره

نصف كيلو أرز أبيض عادى

ربع  كيلو جمبرى مقشر

ربع كيلو بقلاويز " أو بلح البحر   

 خمس بصلات متوسطة + رأس ثوم + خمس حبات طماطم متوسطة+ 2 فلفل غير حار + واحد قرن فلفل حار+جرجير+ كرفس وبقدونس وشبت ونعناع

بهارات + جوزة الطيب مع حبهان وقرنفل وعودين من القرفة+ فلفل أسمر+ كركم أو كارى

زيت + خل + ثلاث حبات من الليمون
 

الطريقة:

 أولا  :تجهيز صينية الجمبرى والسبيط والكابوريا :
 
 
تغسل جميع المكونات " السبيط والكابوريا والجمبرى المقشر أو الغير مقشر " بماء وصابون أو أى مسحوق للنظافة وإزالة الزفارة ثم يتم تقطيع السبيط وإستخراج أحشائه وخاصة الحبر( المادة المرة السامة التى يطلقها للدفاع عن نفسه وهو حى)

ويقشر من جلده الأسود أو الأحمر حتى يصير أبيض اللون وتنزع قشرته الصلبة الصدفية من داخله( على شكل سيف) ويغسل جيدا ويوضع فى خل وملح وماء لمدة ربع ساعة وتقطع أرجل الكابوريا وتوضع الكابوريا المقطوعة فى خل وملح وماء بعد غسلها جيدا

وتوضع أرجل الكابوريا مع أرجل السبيط مع الجنبرى المقشر فى ماء وخل وملح

يتم وضع البقلاويز فى ماء مغلى للغسيل فيفتح وينظف جيدا بالماء والصابون من الرمل العالق به ثم يوضع مع الكابوريا المقطوعة الأرجل والسبيط والجمبرى بقشرة وتحجز ثمانى  حبات من البقلاويز  لشوربة السى فوود 

يقشر البصل وثمانى فصوص ثوم مقطعة توضع نصها للتتبيل مع جزء من البصل مع الملح بعد التخلص من الماء والخل على السبيط والكابوريا والجمبرى بقشرة ثم يؤخذ الباقى فى صينية يوضع بها نصف كوب زيت عافية ويسخن ثم يوضع البصل أولا وبعد دقيقتين يوضع الثوم بعد التقليب ثم يضاف الفلفل الحار والعادى بعد تقطيعة ثم تقطع الطماطم قطعا صغيرة وتضاف للخليط وبعد خمس دقائق يضاف الجمبرى بقشره والكابوريا والسبيط ثم يضاف نصف كوب من الخل وعصير ليمون حسب الحاجة ويضاف الفلفل الأسود والبهارات والكركم أو الكارى ونصف حبة جوزة الطيب مع خمس حبات قرنفل وخمس حبات حبهان بعد طحنها فوريا حتى لاتفقد رائحتها ويضاف عودين من القرفة ويوضع فى فرن متوسط الحرارة لمدة نصف ساعة ويمكن تغطيته بغطاء للمحافظة على النكهة والريحة

يتم إستخراج الصينية ووضع بعض من الكرفس والشبت والبقدونس والنعناع المقطع فوقها ثم تصفية السوب (ماء البصل والمكونات والطماطم ) فى إناء لأستخدامه للسى فود وترص المكونات فى قالب كبير للتقديم  مع إضافة الخضرة( بقدونس وكرفس وشبت ونعناع وترنشات الخيارأو الجرجير والليمون) .
 

ثانيا : تجهيز شوربة السى فود:
 
 

توضع ملعقتان من الزيت فى حلة متوسطة ويقطع أربع فصوص ثوم وتوضع على النار ثم تضاف أرجل الكابوريا والسبيط والجمبرى المقشر بعد تقطيعه ويضاف  البقلاويز( ثمانية حبات) ثم يقلب حتى يتغير لونه ( للبرتقالى) ثم يضاف السوب ويضاف عدد أربعة كوب ماء  ويترك ربع ساعة ليكون جاهزا ويمكن إضافة الملح والبهارات حسب الحاجة
 
 

ثالثا: تجهيز الأرز الأبيض : 

يغسل نصف الكيلو الأرز ويحمر بالزيت لمدة خمس دقائق ويضاف الماء الساخن بنفس عدد أكواب الأرز والملح ويغلى حتى يجف الماء ثم تقلل النار حتى يختم

ولايجب رفع غطاء الأرز إلا بعد حوالى نصف ساعة على الأقل 

 هذه الوجبة تكفى لأربعة أشخاص
 

وبالهناء والشفاء

فاروق عبد الحفيظ سحير

مهندس بالمعاش